Sferik güzgünün qaytardığı ixtiyari şüanın yolunu bilməklə istənilən cismin xəyalını qurmaq mümkündür. Bu məqsədlə cismin kənar nöqtələrinin xəyalı qurulur. Kənar nöqtələrdən çıxan şüalar elə seçilir ki, onların güzgüdən qayıtdıqları yolları qurmaq asan olsun. Bu baxımdan cismin B kənar nöqtəsinin xəyalını qurmaq üçün aşağıdakı şüaların seçilməsi əlverişlidir (a): 1. Güzgünün optik mərkəzindən keçən 1 şüası. Optik mərkəzdən keçən bu şüa güzgünün səthinə hansı yolla düşürsə, həmin yolla da qayıdır (1' şüası). 2. Güzgünün fokusundan keçən 2 şüası. Bu şüa güzgüdən baş optik oxa paralel qayıdır (2'). 3. Güzgünün qütb nöqtəsinə düşən 3 şüası həmin nöqtədən simmetrik qayıdır (3' şüası). 4. Güzgünün baş optik oxuna paralel olan 4 şüası. Bu şüa qayıtdıqdan sonra güzgünün fokusundan keçir (4' şüası).
Beləliklə, bütün qayıdan bu şüalar cismin B nöqtəsinin xəyalı olan B' nöqtəsindən keçir. Ona görə də xəyalqurma sxeminin sadəliyi üçün yuxarıda qeyd edilən şüalardan ixtiyari ikisindən istifadə etmək kifayətdir.
Qeyd edək ki, cismin baş optik ox üzərində olan kənar A nöqtəsinin xəyalı da (A' nöqtəsi) baş optik oxun üzərində alınır (bax: a).
Çökük güzgüdə xəyalın qurulması. Cisim məsafəsi ilə güzgünün fokus məsafəsi
arasında münasibətin d ≥ F olduğu bütün hallarda çökük güzgü cismin həqiqi
xəyalını verir, çünki xəyal qayıdan şüaların kəsişməsindən alınır. Cisim məsafəsi
onun fokus məsafəsindən kiçik olduğu (d < F) halda isə çökük güzgüdə cismin mövhumi
xəyalı alınır, çünki cismin xəyalı qayıdan şüaların özlərinin deyil, uzantılarının
güzgünün arxasında kəsişməsindən yaranır.
Çökük güzgüdə cismin beş halda həqiqi, bir halda mövhumi xəyalı alınır:
1. Cisim sonsuzluqda olduqda: d → ∞. Sonsuzluqdan düşən şüalar paralel qəbul olunur və qayıdan şüalar güzgünün fokusunda toplanır: f = F.